தெருமுனை மரபுடைமைக் காட்சிக்கூடங்கள்: காத்தோங்-ஜூ சியாட்

போப்பியா பூரணத்திற்காக பங்குவாங் (சீன முள்ளங்கி) துருவுவதற்கு இந்தத் துருவி பயன்படுத்தப்பட்டது.

களிமண்ணால் செய்யப்பட்ட இந்த அடிக்கட்டையின் சுழல்வடிவக் குழியில் சூடேற்றும் மின்கம்பியை வைத்து, அதற்கு மேலே தட்டையான சட்டியில் போப்பியா மாவுத் தோல் சுடப்படும்.

கிட்டத்தட்ட 30 ஆண்டுகாலப் பயன்பாட்டுக்குப் பிறகு ஓய்வுபெற்ற இந்தச் சுரண்டி, மெல்லிய போப்பியா மாவுத் தோல் வெந்தவுடன் சட்டியிலிருந்து எடுப்பதற்குப் பயன்படுத்தப்பட்டது.

இந்தத் தாமிர அச்சு, குவே பய் டீ ஓடு செய்வதற்குப் பயன்படுத்தப்பட்டது. அச்சை மாவில் தோய்த்து, சூடான எண்ணெய்யில் முக்கி பொரிப்பது வழக்கம். பொரித்த ஓடுகளை நன்றாகக் காயவைத்து, அதில் துருவிய கேரட், பங்குவாங் (சீன முள்ளங்கி), இறால் ஆகியவற்றை நிரப்புவார்கள்.

இதுதான் கடையை நிறுவிய குவெக் ட்ரென் வென்னின் பதிவுப் பத்திரம். அவர் 95 ஜூ சியாட் சாலையில் வேலை செய்ததாக, 1940-களைச் சேர்ந்த இந்தப் பத்திரம் காட்டுகிறது.

ஒரு குடும்பமாகச் சேர்ந்து கடையில் எப்படி போப்பியா தயாரித்தார்கள் என்பதை 1990-களைச் சேர்ந்த இந்தப் புகைப்படங்கள் காட்டுகின்றன. கெர் செங் லாயும் அவரது மகளும் மாவைத் தயாரிப்பார்கள் (மேல்படம்). அதன்பின் குடும்பத்தினர் ஒன்றாகச் சேர்ந்து மாவுத் தோலையும் பூரணத்தையும் தயாரிப்பார்கள் (கீழ்ப்படம்).

இந்த கசுட் மனிக் (மணி பதித்த காலணிகள்), லீ கிம் சூவுக்குச் சொந்தமானது. உடன்பிறவா சகோதரி ஒருவருக்குப் பொருளாதார உதவி செய்வதற்காக, இந்தக் காலணிகளைத் தயாரித்துத்தர அவருக்குப் பொறுப்பளித்திருந்தார் லீ. இன்று, பெரனக்கன் மணி வேலைப்பாட்டுக் கலைத்திறனை பொதுப் பயிலரங்குகள் மூலம் இவரது குடும்பத்தினர் வளர்க்கின்றனர்.

லீ கிம் சூ, 60 ஜூ சியாட் பிளேஸ் முகவரியில் வேலை செய்த தனது ஊழியர்களுக்காகத் தயாரித்த பானங்களை எடுத்துச்செல்ல இந்தத் தூக்குச்சட்டியைப் பயன்படுத்தினார்.

1997-ல் எடுக்கப்பட்ட இந்தப் புகைப்படத்தில், கடையின் இரண்டாம் தலைமுறையான ஹெலன் லிம், வோங் சின் மின் தம்பதியரைக் காணலாம். கிம் சூவின் உணவுப் பட்டியலில் குட்டி குவே சாங் (வலது) பலகாரத்தை அறிமுகப்படுத்தியவர் ஹெலன் லிம். கிம் சூ டம்ப்ளிங்ஸ் அனைத்துமே உணவுத்தரமிக்கப் பருத்திக் கயிற்றால் கட்டப்பட்டிருக்கும். முன்பிருந்த நைலான் கயிற்றுக்குப் பதிலாகச் சுற்றுப்புறம் காக்கும் முனைப்பாகப் பருத்திக் கயிறு அறிமுகமானது.

கடை நிறுவனர் லீ கிம் சூ, 60 ஜூ சியாட் பிளேஸ் முகவரியில் அமைந்திருந்த கடையில் பலவகை டம்ப்ளிங்ஸ் விற்பனை செய்வதை 1978-ல் எடுக்கப்பட்ட இந்தப் புகைப்படம் காட்டுகிறது. இந்த முகவரியில், இன்று வரை கிம் சூ தயாரிப்புகள் விற்கப்படுகின்றன.

குவே சாங் அவிக்கப்பட்ட நீராவிக் கலனில் லீ கிம் சூ போட்டு வைத்திருந்த நாணயங்களில் ஒன்று இது. கலனில் உள்ள தண்ணீர் வற்றும்போது நாணயங்கள் ஒன்றுக்கொன்று இடித்து சத்தம் எழுப்பும். கலனில் தண்ணீர் நிரப்புமாறு ஊழியர்களுக்கு அது நினைவுபடுத்தும்.

இந்த பீங்கான் பாத்திரத்தில் முன்பு நறுக்கிய பச்சை மிளகாய் போட்டு வைக்கப்பட்டிருந்தது. வாடிக்கையாளர்கள் தங்கள் விருப்பத்திற்கேற்ப நூடல்ஸில் காரம் சேர்த்துக் கொள்ளலாம்.

அலங்காரமான சேவல் வடிவம் கொண்ட இந்தக் கிண்ணத்தில் சூப் பரிமாறப்பட்டது. வாடிக்கையாளர்கள் வேறொரு கிண்ணத்தில் பிடிகுச்சிகளுடன் நூடல்ஸ் சாப்பிட்டனர். உடனுள்ள சிறு தட்டு, மிளகாய் அல்லது இதர சுவைச்சாறுகள் வைப்பதற்குப் பயன்பட்டது. 

பெரிய அளவிலான இந்தப் பிடிகுச்சிகளும் எஃகு வடிகட்டியும், நூடல்ஸ் வேகும்போது கிளறுவதற்கும் வடிப்பதற்கும் பயன்படுத்தப்பட்டன.

சான் குடும்பத்தினர் தள்ளுவண்டியுடன் ஜூ சியாட் வீதிகளை வலம் வருகையில், கடை நிறுவனர் இதுபோன்ற மரக்கட்டைக் காலணிகளையும் பயன்படுத்தப்பட்ட மாவுச் சாக்கைக் கொண்டு செய்யப்பட்ட அரைக்கால் சட்டையையும் அணிந்துகொண்டு தனித்துவமாகக் காட்சியளித்தார்.

வீதி வீதியாக வலம் வந்த தாத்தாவின் தள்ளுவண்டி வந்து கொண்டிருப்பதை அறிவிப்பதற்காக “டொக் டொக்” சத்தம் செய்வதற்கு லிம் லூன் ஹுவாட் சிறுவயதில் இதுபோன்ற மூங்கில் கருவியைப் பயன்படுத்தினார். 

உணவகத்தின் பெயரும், 214 ஜூ சியாட் சாலை முகவரியின் பழைய ஐந்து இலக்கத் தொலைபேசி எண்ணும் பொறிக்கப்பட்ட இந்தக் கரண்டி தட்டுவகைகள், திருமண, பிறந்தநாள் கொண்டாட்டங்களின்போது பயன்படுத்தப்பட்டன.

214 ஜூ சியாட் சாலை முகவரியில் அமைந்திருந்த உணவகத்திற்கு வெளியே எடுக்கப்பட்ட இந்தப் புகைப்படத்தில், 1963-ல் நடந்தேறிய இரண்டாம் தலைமுறை உரிமையாளர் யாப் காவ் சூன், அவரது மனைவி லீ லாய் சான் ஆகியோரது திருமணக் கொண்டாட்ட நினைவுகளைக் காணலாம்.  

குவான் ஹோ சூன் 1974-ல் ஒரு தொழிலாக அதிகாரபூர்வமாகப் பதிவு செய்யப்பட்டதையும், 1953-ல் திறக்கப்பட்டதையும் இந்தச் சான்றிதழ் காட்டுகிறது.

இந்த முத்திரைகள், கடையை நிறுவிய யாப் சீ குவீயின் காலத்தில் பயன்படுத்தப்பட்டவை. உணவகத்தின் பெயர் பொறிக்கப்பட்ட உலோக முத்திரை (இடதுபுறம்) அதிகாரபூர்வப் பத்திரங்களுக்குப் பயன்படுத்தப்பட்டது. மர முத்திரை (வலதுபுறம்) விருந்துகளில் பரிமாறப்பட்ட ஓர் உணவின் பெயரை அச்சிடுவதற்குப் பயன்படுத்தப்பட்டது. இந்த அச்சில் லொங் யான் சான் சீ என்று பொறிக்கப்பட்டுள்ளது. “விழாவை நிறைவுக்குக் கொண்டுவரும் லொங்கான் இனிப்பு” என்பது அதன் பொருள்.

சின் ஹெங் உணவகம் ஆரம்பகால ஆண்டுகளில் பயன்படுத்திய மண்பானைகளில் இதுவும் ஒன்று. நெடுநேரம் வரை சூட்டைத் தக்கவைக்கும் தன்மைகொண்ட இந்தப் பானையில் பரிமாறப்பட்ட பக் குட் தே சாறை வாடிக்கையாளர்கள் அவசரமின்றி ரசித்து ருசித்து உண்டனர்.

பக் குட் தே-யுடன் சீனத் தேநீர் பருக விரும்பிய வயதுமூத்த வாடிக்கையாளர்களுக்கு இந்தப் பாரம்பரியக் கலன்களில் தேநீர் பரிமாறப்பட்டது. இளைய தலைமுறையினருக்குக் கண்ணாடிக் குவளைகளே அதிக பழக்கப்பட்டது.

நிப்பா கிருமி 1999-ல் பரவியபோது, சின் ஹெங் உணவகம் அறிமுகப்படுத்திய பற்பல புதிய உணவு வகைகளில் இரண்டை இந்தச் சுவரொட்டி காட்டுகிறது. இவை இன்று வரை வாடிக்கையாளர்களிடையில் பிரபலமாக உள்ளன.

பின்னிரவு நேர உணவாக பக் குட் தே பிரபலமாக இருந்ததால், சின் ஹெங் உணவகம் இருபத்துநான்கு மணிநேரச் சேவை வழங்கிய 2000-ஆம் ஆண்டுகளின் முற்பகுதியில் அச்சிடப்பட்ட ஆர்டர் சீட்டு இது.

பன்றி விலா எலும்புகளையும் மூட்டுகளையும் வெட்டுவதற்கு லிம் சீ கவாங் பயன்படுத்திய பழைய வெட்டுக்கத்தி இது. இன்று, சின் ஹெக் உணவகம் இயந்திரங்களைப் பயன்படுத்துவதால், மாமிசம் அதிக வேகமாகவும் சுகாதாரமாகவும் தயாரிக்கப்படுகிறது.

ஜூ சியாட் சாலையில் 1983-ஆம் ஆண்டு நடந்தேறிய சின் ஹெங் உணவகத் திறப்புவிழாவில் தே சகோதரிகளும் அவர்களது குடும்பத்தினரும் எடுத்துக்கொண்ட புகைப்படம் இது. அவர்களது சமையல்கலைப் பயணத்தில் இந்த உணவகம் ஒரு முக்கிய மைல்கல்.

“மூன்கேக்” பணியாரங்களும் மற்ற பலகாரங்களும் செய்வதற்குப் பயன்படுத்தப்பட்ட மர அச்சுகள் இவை. படத்தில் (கடிகார முள் நகரும் திசையில், இடதுபுறத்திலிருந்து) பாரம்பரிய “மூன்கேக்”, மீன் வடிவ சீனப் புத்தாண்டு பலகாரம், நவீன மென்தோல் “மூன்கேக்” அச்சுகளைக் காணலாம்.

டி’பன் கடையில் வழங்கப்படும் பலகாரங்களை விரிவுபடுத்தும் முயற்சியாக, 1990-களின் பிற்பகுதியில் முதன்முதலில் தயாரிக்கப்பட்ட “மூன்கேக்” பணியாரங்கள் இந்தப் பெட்டியில் வைக்கப்பட்டன.

டி’பன் தயாரித்த புதுமையான பல்வேறு பிரத்யேக விழாக்காலப் பலகாரங்களை இந்த மாதிரிவடிவங்கள் காட்டுகின்றன. பூக்கும் பியோனி மலரின் வடிவிலான ஹுவா காய் ஃபூ குய் (இடதுபுறம்), அதிர்‌‌ஷ்டத்திற்காக உண்ணப்படும் கறுப்பு பூஞ்சணமான ஃபா சாய் நிரப்பப்பட்ட லீ மன் பாவ் ஃபா பன்ரொட்டி (வலதுபுறம்) போன்றவை அவற்றுள் உள்ளடங்கும்.